Gecə saat üçdür və mən səni sevirəm

sən də çıxıb gedəndən
buralarda hüzndür.
yarıdan çox ağrımaq,
sən bildiyin üzüntü…

hər şey qoyduğun kimi,
hər şey yerli-yerində.
dəyişən heç nə yoxdur
ayrılıq şəhərində…

bizdə bütün ilboyu
qaranlıqdır pəncərə.
gündə yüz yol ölürəm,
darıxıram min cürə…

necə ki, səhər olur
günəş çıxır işartı,
məni rahat buraxmır
zəhrimar bu diş ağrı…

gör nə qədər vaxt keçib
bildiyin nə çox, nə az.
sənə daha demirəm
vaxtın olsa, mesaj yaz…