Anam və həyatın mənası

Yalom bu kitabda bənzərsiz təhkiyə üslubu ilə insan psixologiyasının sirli və dərin qatlarına necə ustalıqla nüfuz etdiyini bir daha sübut edir. O, bir-birindən fərqli 6 hekayədə öz psixoterapiya təcrübəsinə əsaslanaraq, pasiyentlərin nevrotik vəziyyətlərindən çıxıb transformasiya keçirməsinə yardım edir. Bu müalicələri ənənəvi və psixologiya elminin müəyyənləşdirdiyi tibbi “qaydalara” əsaslanan bir metodla deyil, özünün orijinal yanaşması və pasiyentlə qurduğu səmimi münasibət əsasında həyata keçirir. Hətta bəzi anlarda özünü “oda atır”, tənqid etməkdən qorxmur. Oxucu mütaliə prosesində iki təcrübəni bir anda yaşayır: həm qeyri-adi həyat hekayələri oxuyur, həm də özünü psixoterapevtin kabinetində hiss edir.

Bu hekayələri oxuyarkən insan ekzistensial həqiqətlərlə üzbəüz qalır, başqa insanların üzləşdiyi varlıq, həyat, ölümlə bağlı dərin suallar onu da düşündürür və öz psixikasını yenidən dəyərləndirir. Yalom bizə həm də müasir dünyada artıq “əl-əl axtarılan” başqasını dinləməyi, insanın düşdüyü ağır situasiyanı duymağı öyrədir..