Örtünmə Anlayışı

Qadının örtünməsi yalnız İslamın göstərişidir, yoxsa İslamdan əvvəl də dünya xalqları arasında bu adətə rast gəlinib? Örtünmək guşənişinliyə və cəhalətə səbəb olurmu? Ümumiyyətlə, qadın nə üçün örtünməlidir? Örtünməklə qadının ictimai fəaliyyəti arasında ziddiyyət varmı və ya bu göstəriş qadını evdə həbs etməkdirmi?

Örtünmə anlayışı ilə bağlı müxtəlif arqumentlər irəli sürülüb, bunlardan bəzisi fəlsəfi, bəzisi əxlaqi, bəzisi də psixolojidir. Böyük müsəlman mütəfəkkiri Mürtəza Mütəhhəri kitabda səbəb kimi göstərilən bu arqumentləri obyektiv şəkildə dəyərləndirərək, ya onlardan hansısa birinin təkbaşına yetərli olmadığını, ya da örtünməklə bu müddəalar arasındakı uyuşmazlığı göstərir.

Eyni zamanda M. Mütəhhəri bir tərəfdən rasional arqumentlərə, digər tərəfdən nəqli dəlillərə söykənərək örtünmənin sosial həyatla heç bir ziddiyyət təşkil etmədiyini, islami örtünmənin qadının inkişafına nəinki mane olduğunu, əksinə, onun azad bir fərd kimi yetişməsində mühüm rol oynadığını bildirir.