Vadi

Yazardan yenə fərqli bir əsər! Bu roman da Aqata Kristinin Erkül Puaro haqqında olan əsərləri seriyasındandır. Puaronun çox aktiv rol almadığı, əsasən müşahidəçi mövqeyində olduğu bir əsərdir. Bu da bizə əsərin digər obrazları ilə daha yaxından tanış olmağa imkan verir. Ailədaxili problemlər, sevgi münasibətlərində sərhədlərin düzgün qoyulması və başqa bu kimi mövzulara müəllif xüsusi diqqət vermişdir.

Aqata Kristi məşhur İngiltərə yazıçısı, detektiv janrının kraliçasıdır. Onun əsərləri dünyanın 100-dən çox dilinə tərcümə olunub. Bəşəriyyət tarixində əsərləri ən çox çap olunan yazıçıdır. Aqata Kristinin 60 detektiv romanı, 6 psixoloji romanı, 19 hekayə almanaxı çap olunub, 16 pyesi London səhnələrində tamaşaya qoyulub. Həmin məşhur əsərlərin sırasında “Vadi” (ing. Hollow) detektiv romanı da hadisələrin qurulmasına, obrazların fərqliliyinə görə yazıçının yaradıcılığında olduqca önəmli yer tutur. Bu əsər ilk dəfə 1946-cı ildə Britaniyada “Collins Crime Club” nəşriyyatında, eyni zamanda da ABŞ-ın “Dodd, Mead and Company” nəşriyyatında çap olunub.